Kryetarja e KQZ’së Valdete Daka ka konfirmuar për Express se ka pranuar nga Aleksander Jabllanoviq dokumentin për ndryshimet e fundit brenda Listës serbe, ku sipas këtyre ndryshimeve Jabllanoviq i rikthehet pozitës së vjetër duke u bërë kështu kryetar i këtij subjekti.

Daka ka sqaruar se institucioni ku ajo vepron nuk merret me atë se si janë bërë ndryshimet por ata vetëm i pranojnë informatat për çfarëdo vendimi që e bën një subjekt politik.

“Aleksander Jabllanoviq ka ardh tek KQZ’ja dhe e ka sjell dokumentin me ndryshime. Ne nuk mund të konfirmojmë nëse ai është kryetar i ri ose jo pasi ne vetëm i pranojmë informatat për ato ndryshime. KQZ-ja si institucion merret me çështjet e brendshme të iniciativave qytetare, dhe ne nuk kemi kompetencë mu marr me mosmarrëveshjet e tyre të brendshme. Krejt çka na marrim është vetëm informatat kur bëhen ndryshimet e personave zyrtarë të cilët komunikojnë personin kontaktues të subjekteve politike me KQZ-në e sidomos gjatë fushatës kur i paraqesin edhe pasqyrat financiare të fushatës”- tha më tutje Daka.

Përndryshe çka bëjnë ata brenda subjektit politik qysh i zgjedhin kryetarët qysh i shkarkojnë ose emërojnë nuk është çështje që i takon KQZ-së”, u shpreh Daka për Express.

Daka sqaroi se ata nuk e bëjnë as monitorimin e subjekteve të tyre pasi siç bën të ditur ajo, ata nuk e kanë këtë kompetencë.

“Ata mundem me na sjellë informata por për neve nuk është me rëndësi ndryshimet që i bojnë brenda subjektit apo mënyrën që e bëjnë këtë ndryshim.. ne mundemi me bo ndryshime por nuk jemi ata që i konfirmojnë ato ndryshime.Na nuk e bëjmë konfirmimin që ky është kryetar apo ai ne vetëm i pranojmë dokumentet” tha ndër tjerash Daka.